Sep 13, 2017    სმარტფონები  iPhone 8, Apple, iPhone 8 plus

Apple-მა iPhone 8 და 8 Plus წარადგინა

გუშინ, კუპერტინოში, Steve Jobs-ს მიძღვნილ თეატრში, Apple-მა უახლესი iPhone 8, 8 Plus და X (ათი) წარადგინა. ამ სამი მოდელიდან ყველაზე საინტერესო რა საკვირველია iPhone X არის, რომელიც შეიქმნა სპეციალურად, iPhone-ის ათი წლისთავის აღსანიშნავად. iPhone X-ზე მოგიყვებით შემდეგ პოსტში, აქ განვიხილოთ iPhone 8 და 8 Plus:

დიზაინში სიახლე ნაკლებადაა, რადგანაც ეს უფრო 7 და 7 Plus-ის გაძლიერებული ვერსიებია, რომლებიც მოიაზრებოდა, რომ 7S და 7S Plus დაერქმეოდა, თუმცა ყველასათვის მოულოდნელად, Apple-მა ახალ სმარტფონებს 8-ის სახელი მიანიჭა. ერთადერთი უდიდესი ცვლილება არის ის, რომ Apple-მა უარი თქვა Unibody ალუმინის 7000 სერიის კორპუსზე და iPhone 8-ში ახლა შუშის უკანა მხარეს იყენებს, რის გამოც მოხერხდა უსადენო დამუხტვის ჩაშენება. შეიცვალა ფერთა არჩევანი. ახლა მომხმარებლისთვის 3 განსაკუთრებული ფერია ხელმისაწვდომი: შავი, თეთრი და ახალი ტიპის ოქროსფერი, რომელიც აქამდე არ გვინახავს. შავ ფერში უკანა პანელს ახლა მცირე დაბურულობა აქვს და ის უფრო ნაცრისფერს წააგავს.

ტექნიკური მონაცემებიდან, iPhone 8-ს 4.7 ინჩიანი ეკრანი აქვს იმავე რეზოლუციით, რაც 7-ზე იყო, 8 Plus-ს კი 5.5 ინჩიანი ეკრანი აქვს, ისევ იმავე რეზოლუციით. შეიცვალა პროცესორი, რომელიც ახლა უფრო სწრაფი, ენერგო-ეფექტულია და ახალი ფუნქციები აქვს ჩაშენებული, როგორიცაა ნეირული ჩიპი ხელოვნური ინტელექტისთვის და მანქანური სწავლებისთვის. Apple-ი მას A11 Bionic-ს უწოდებს.

3D Touch არსად წასულა, ფერების ფართე გამაც და წყალგაუმტარობაც არის, თუმცა ეკრანებს ახლა True Tone ფუნქცია დაემატა, რაც ფერებს მოარგებს გარე სამყაროს მიხედვით.

კამერა ისევ 12 მეგაპიქსელიანია, თუმცა Apple-ი ამბობს, რომ ახალ A11 Bionic პროცესორში ახლა ფოტოს დამუშავებისთვის გამოცალკევებული ISP პროცესორია უფრო სწრაფი გადაღებისთვის, ისევე, როგორც ეს ანდროიდ ფლაგმანებში გვხვდება. დიაფრაგმა ისევ f/1.8 არის, 8 Plus-ს ასევე მეორე ტელეფოტო კამერა აქვს 12MP რეზოლუციითა და f/2.8 დიაფრაგმით.

ტელეფოტო სენსორს ახალი ფუნქციონალი შეემატა. A11 Bionic-ის ISP-ის საშუალებით და ხელოვნური ინტელექტით, პორტრეტული რეჟიმი გაცილებით უფრო გაუმჯობესებულია, შეუძლია სიღრმის უფრო კარგი ამოცნობა, რამაც საშუალება მისცა კომპანიას ჩაეშენებინა სიღრმისეული ფილტრები, რომლებიც მძლავრი პროცესორის ხარჯზე რეალურ დროში მუშაობენ. მაგალითისთვის, შეგვიძლია პორტრეტულ რეჟიმს სტუდიოს განათება შევმატოთ ან შევცვალოთ სახის კონტრასტი.

ოპერატიული მეხსიერება 2GB არის 8-ში, ხოლო 8 Plus-ში 3GB, შიდა მეხსიერება 64 და 256GB არის. ბატარეის მოცულობა ჯერ-ჯერობით უცნობია, თუმცა Apple-ი გაუმჯობესებულ ხანგრძლივობას გვპირდება. როგორც აღვნიშნე, არის უსადენო დამუხტვა qi სტანდარტით, ამრიგად ის ნებისმიერ უსადენო მმუხტავ მოწყობილობაზე დაიტება, ასევე როგორც იქნა, სმარტფონს დაემატა სწრაფი დამუხტვა, რასაც iPhone-ის მომხმარებლები ძალიან დიდი ხანია ითხოვდნენ. სმარტფონს დამუხტვა 30 წუთში 50%-მდე შეუძლია.

ფასების და ხელმისაწვდომობის მხრივ, სმარტფონები გაყიდვაში ჩაეშვება 15 სექტემბერს, იქნება 64 და 256GB ვერსიები, ფასი კი iPhone 8-ისთვის იწყება $699-დან, ხოლო 8 Plus-ის ფასი $799-დან.