Dec 7, 2017    სმარტფონები  Asus Zenfone Max

Asus-ის პირველი შემცირებულ ჩარჩოებიანი სმარტფონი -
ZenFone Max Plus (M1)

Asus-ი ერთადერთი მწარმოებელია, რომელიც მხოლოდ ახლახანს გადავიდა ტრენდულ 18:9 ასპეკტური ფარდობის ეკრანებზე, მათი პირველი სმარტფონი მსგავსი ფორმატით კი ZenFone სერიიდან არის, რომელიც Max Plus (M1) სახელით მოგვევლინა. ამჟამად უცნონია, თუ როდის შემოვა მოწყობილობა გაყიდვაში ან რა ეღირება, თუმცა ცნობილია ძალიან ბევრი რან ტექნიკური მახასიათებლების შესახებ.

მაშასადამე, ZenFone Max Plus (M1) თავიდან ბოლომდე საშუალო კლასის სმარტფონია, რომელიც მუშაობს Android-ის უკვე მოძველებულ, 7.0 ვერსიაზე Asus-ის ZenUI 4.0 ინტერფეისული ზედნადებით. არის სმარტფონის ორი კონფიგურაცია - 2GB ოპერატიული და 16GB შიდა მეხსიერებიანი და უფრო გაძლიერებული 3GB ოპერატიული და 32GB შიდა მეხსიერებიანი.

შიდა მახასიათებლებს რაც შეეხება, მოწყობილობა Mediatek-ის 6750T პროცესორზე მუშაობს, მხარს კი ზემოთ აღნიშნული ოპერატიული და შიდა მეხსიერება უჭერს. წინა ნაწილზე მას 5.7 ინჩიანი Full HD+, კერძოდ კი 1080 x 2160 გაფართოების ეკრანი აქვს, რომელსაც 18:9 ასპეკტური ფარდობა აქვს.

სმარტფონის მეორე გამორჩეული ღირსშესანიშნაობა ორმაგი კამერაა, რომელიც ერთი 16 მეგაპიქსელიანი, ხოლო მეორე 8 მეგაპიქსელიანი სენსორისგან შედგება, საიდანაც ორივეს F/2.0 დიაფრაგმა აქვს. მეორე კამერა არ არის არც მონოქრომული და არც ტელეფოტო მახასიათებლის, როგორც უკვე სხვა სმარტფონებში ვიხილეთ წელს, არამედ ის მხოლოდ და მხოლოდ სიღრმის ამოსაცნობად გამოიყენება პორტრეტული რეჟიმისთვის და ცალკე მისი გამოყენება შეუძლებელია. ჯერ-ჯერობით უცნობია, თუ როგორი პორტრეტები გამოდის Asus-ის ორმაგი კამერით, თუმცა კომპანია აღნიშნავს, რომ მასზე ძალიან დიდი დრო დახარჯა და მაქსიმალურად შეეცადა ის ბაზარზე ერთ-ერთი საუკეთესო შექმნას საშუალო კლასის სმარტფონებს შორის. წინა მხარეს, სელფებისთვის სმარტფონს 8 მეგაპიქსელიანი კამერა აქვს.

ბატარეის მხრივ, ZenFone Max Plus (M1)-ს საკმაოდ დიდი, 4,130 მილიამპერიანი ბატარეა აქვს, ხოლო Mediatek-ის ენერგოეფექტური პროცესორის გამო კომპანია გვპირდება, რომ მოწყობილობა ერთ სრულ დღეს ყველანაირი პრობლემის გარეშე გაძლებს, ისე, რომ მეორე დღესაც იქნება დარჩენილი ბატარეა. რა თქმა უნდა არის ასევე სწრაფი დამუხტვის ტექნოლოგიაც, რაც უკვე ტრადიციადაა ქცეული სმარტფონებში. ყუთში მოყოლებული დამტენით შესაძლებელია 50%-ზე ასვლა 30 წუთში, რაც სიახლე არაა და სწრაფი დამუხტვის სტანდარტს წარმოადგენს დღეს-დღეობით.

აღსანიშნავია ისიც, რომ 18:9 ეკრანის გამო სმარტფონის თითის ანანეჭდის სენსორმა უკანა მხარეს გადაინაცვლა, ნაცვლად წინა მხარისა, სადაც Asus-ი ათავსებდა ხოლმე მას წინამორბედებში. სმარტფონი ახლახანს დაანონსდა რუსეთში და დიდი ალბათობით საერთაშორისო ბაზარზეც გავა. როგორც უკვე აღვნიშნე ზემოთ, ფასი ჯერ-ჯერობით უცნობი რჩება, თუმცა ნაღდად არ უნდა მოველოდოთ $400-ს გადაჭარბებულ საფასო ნიშნულას, ვინაიდან Asus-ი მუდმივად დაბალ ბიუჯეტურ სმარტფონეზეა ორიენტირებული და ესეც - საშუალო კლასის სმარტფონია.