Sep 25, 2017    სმარტფონები  google pixel, pixel 2, Made By Google.

Google-ის 4 ოქტომბრის ღონისძიება: რას უნდა ველოდოთ?

გასულ წლის 4 ოქტომბერს, მსოფლიოს უდიდესმა კომპანიამ თავისი წარმოების პირველი სმარტფონი გამოუშვა. ალბათ კარგად გეცოდინებათ Pixel, რომელიც 2016 წლის წამყვან Android სმარტფონად და DxOMark-ის ტესტირების მიხედვით საუკეთესო კამერის მქონე მოწყობილობად დასახელდა. როგორი გასაკვირიც არ უნდა იყოს, სმარტფონმა ეს ორი ტიტული 2017 წელსაც შეინარჩუნა, რაც უდავოდ ნიშნავს იმას, რომ Google-ი ნამდვილად გამორჩეულ და ხარისხიან პროდუქტს ქმნის, იმის მიუხედავად, რომ ის ისეთი ცნობილი (გაყიდვადი) ჯერ-ჯერობით არაა, როგორიც Apple-ის ან Samsung-ის სმარტფონები.

სმარტფონებთან ერთად კომპანიამ ასევე თავისი “Made By Google” პორტფოლიოს პროდუქცია წარადგინა, საიდანაც აღსანიშნავია: ჭკვიანი სახლის დინამიკი - Google Home, ჭკვიანი როუტერი - Google Wi-Fi და ვირტუალური რეალობის სათვალე - Google Daydream View.

ამავე წლის 4 ოქტომბერი ძალიან მალე დადგება, რაც ნიშნავს იმას, რომ Google-ი განახლებულ “Made By Google” პორტფოლიოს წარადგენს.

პორტფოლიოს ვარსკვლავი უდავოდ Pixel 2 იქნება, რომელიც ისევე როგორც გასულ წელს, გამოვა ორ კონფიგურაციაში: Pixel 2 და Pixel XL2, თუმცა წინა წლის სმარტფონებთან და მათ “იგივეობასთან” შედარებით, 2-სა და 2XL-ს შორის დიდი განსხვავება იქნება, კერძოდ კი დიზაინში.

პირველი თაობის Pixel და Pixel XL ერთმანეთის იდენტური იყვნენ როგორც დიზაინის, ისე ტექნიკური მახასიათებლების მხრივ, თუმცა მათი უდიდესი პრობლემა დიზაინი იყო, რომელიც ბევრისთვის ზედმეტად ინსპირირებული იყო Apple-ის iPhone-დან. ბევრი უჩიოდა ეკრანს გარშემო კანტებს, რომლებიც მხოლოდ ეკრანის ბარიერები იყვნენ და არანაირი ფუნქცია არ გააჩნდათ.

მეორე თაობის Pixel-ებს შორის Google-ი დიზაინის მხრივ ცვლილებებს შეიტანს. Pixel 2 ისევ ჩარჩოებიანი სმარტფონი იქნება, ხოლო ფლაგმანური მოდელი ამჯერად Pixel XL2 იქნება, რომელსაც 18:9 ასპეკტური ფარდობის უჩარჩო ეკრანი ექნება, ისევე როგორც LG-ის ახალ გამოშვებულ V30 ფლაგმანურ სმარტფონს.

ორივე მოდელს სტერეო კონფიგურაციის დინამიკები შეემატება, რაც მცირე Pixel 2-ის ჩარჩოებს ფუნქციას შემატებს და ბარიერები უადგილო ნამდვილად არ იქნება. Pixel 2-ის ეკრანი ისევ 5 ინჩიანი იქნება 1080P რეზოლუციით, რაც ასეთი ზომისთვის სავსებით საკმარისია, ხოლო Pixel XL2-ს 5.99 ინჩიანი 1440P რეზოლუციით, როგორც უკვე აღვნიშნე, 18:9 ასპეკტური ფარდობით, რის შედეგადაც ის უჩარჩოო და კომპაქტური იქნება. ორივე სმარტფონი Snapdragon 835 პროცესორზე იმუშავებს 4GB ოპერატიული მეხსიერებით წყვილში.

ფერების მიხედვით, Pixel 2 ხელმისაწვდომი იქნება “უბრალოდ შავი” , “აშკარად თეთრი” და “თითქოს ლურჯ” ფერებში, ხოლო უჩარჩო Pixel XL2 ორ ფერთა კონფიგურაციაში გამოვა, ესენია: “შავ-თეთრი” და ისევ “უბრალოდ შავი”. როგორც ჩანს Google-ი ფერებს ისევ ხუმრობით ეძახის, იმის კონტრასტზე, როდესაც სხვა მწარმოებელი თავის ფერებს “საფირონის შავი”, “მარმარილოსებრი თეთრი” და ზედმეტად იდეალურ სახლებს ეძახის.

ფასებს და კონფიგურაციებს რაც შეეხება, Pixel 2-ის 64GB ვერსია ისევ $649 ეღირება, 128GB ვერსია $749, ხოლო უჩარჩოო Pixel XL2-ის ფასი დაიწყება $849-დან 64GB ვერსიაში, ხოლო 128GB მოდიფიკაცია $949 ეღირება. ფასი რა თქმა უნდა ძალიან მაღალია, თუმცა ის უტოლდება სხვა მწარმოებლების ფასებს, როგორიცაა Samsung-ის $930-იანი Galaxy Note 8 და Apple-ის $999-იანი iPhone X.

სხვა “Made By Google” პროდუქტებიდან კომპანია წარადგენს Google Home Mini-ს, რომელიც გასული წლის Google Home-ის მომცრო ვერსია იქნება საკმაოდ დაბალ ფასად - $49-ად. განახლდება Google Daydream View, თუმცა ადრე თუ $79 ღირდა, ახლა $99 ეღირება. კომპანია ასევე გამოუშვებს PixelBook-ს - ლეპტოპს ChromeOS საოპერაციე სისტემაზე Android აპლიკაციების მხარდაჭერით, რომელიც $1,249-დან დაიწყება და მაქსიმალური კონფიგურაციით $1,749-მდე ავა, მასთან ერთად კი დამატებითი კალამი იქნება - PixelBook Pen, რომელიც $99-ად გაიყიდება.

Google-ის “Made By Google” ღონისძიების პირდაპირი ტრანსლაცია 4 ოქტომბერს, თბილისის დროით საღამოს 8 საათზე გაიმართება. პირდაპირი ტრანსლაციის ნახვა შესაძლებელია აქ.