Oct 5, 2017    სმარტფონები  Google, pixel 2, Google Pixel 2

Google-მა Pixel 2 და Pixel 2 XL წარადგინა

გასული წლის Pixel იყო Google-ის ბრენდირების ქვეშ პირველი მცდელობა სმარტფონის შექმნის და ეს ექსპერიმენტი ნამდვილად გამართლდა. მართალია Pixel-ი ორი უმსხვილესი ბრენდის - Samsung და Apple-ის მსგავსად არ იყიდებოდა და ახლოსაც კი არ იყო, რადგან Google-ი თავისი აპარატურის შექმნაში ჯერ პირველ ნაბიჯებს დგამს, თუმცა ეს ნაბიჯები უკვე იმაზე დიდია, ვიდრე აქამდე იყო.

სხვა Android სმარტფონებთან შედარებით, Pixel-ში ის მყუდრო შეგრძნება არსებობდა, რაც თუნდაც Apple-ის სმარტფონებშია, რადგან აპარატურული და პროგრამული ნაწილი შექმნილია და კონტროლდება თვით Google-ის მიერ, რისი კომბინაციაც ყოველთვის საოცარ შედეგს გვაძლევს. მშვენიერი მაგალითისთვის - Pixel-ის კამერა, რომელიც გაძლიერებული იქნა მანქანური სწავლებითა და ხელოვნური ინტელექტით, რის ხარჯზეც ის 2016 და 2017 წლის საუკეთესო კამერა იყო დღევანდელ დღემდე.

4 ოქტომბერს, სან ფრანცისკოში, “Made By Google” ღონისძიებაზე Google-მა ფარდა ახადა თავის მეორე თაობის ფლაგმანურ სმარტფონს - Pixel 2-ს!

ისევე როგორც გასულ წელს, Pixel 2 კვლავ ორ ზომაში გამოდის.

Pixel 2-ს 5 ინჩიანი ეკრანი აქვს 16:9 კინომატოგრაფიული ასპეკტური ფარდობითა და 1080P რეზოლუციით, ხოლო Pixel 2 XL-ს 6 ინჩიანი ეკრანი 1440P რეზოლუციით და 18:9 ასპეკტური ფარდობით, მრგვალი კუთხეებით, რის გამოც ჩარჩოები უფრო მცირეა დიდ მოდელზე.

ორივე სმარტფონი კვლავ Unibody ალუმინის კორპუსისგანაა დამზადებული, უკანა მხარის შუშის ჩარჩო კი შემცირდა და თითის ანაბეჭდის სენსორს აღარ მოიცავს. დაემატა წყალგაუმტარობა IP67 სერტიფიკაციით, წინა ნაწილზე სტერეო დინამიკები განთავსდა, რის დაბრუნებასაც ფანები დიდი ხანია ელოდნენ. სმარტფონს გვერდებში ასევე წნეხის სენსორი აქვს, ამრიგად მოჭერით შესაძლებელია Google Assistant-ის გამოძახება.

Pixel-ის კამერა ისედაც საუკეთესოდ ითვლებოდა DxOMark-ის ტესტირების მიხედვით, სანამ მას iPhone 8 და Note8 არ დაჩრდილავდა, თუმცა Google-მა ამაში არ დააყოვნა და Pixel 2 საუკეთესო კამერითა და ალგორითმებით აღჭურვა, რის შედეგადაც DxOMark-მა Pixel 2-ს ისევ ისტორიაში ყველაზე მაღალი ქულა - 98 მიანიჭა. კამერის დიაფრაგმა f/1.8-მდე აიწია, დაემატა ოპტიკური სტაბილიზაცია, რომელიც ვიდეოს გადაღებისას გიროსკოპულ სტაბილიზაციასთან მუშაობს საუკეთესო კადრის მისაღწევად. Google-ი არ აჰყვა ყველა მწარმოებლებს და არ ჩააშენა ორმაგი კამერის სენსორი თავის სმარტფონში. ნაცვლად ამისა, თუკი სხვები მეორე კამერისგან იღებენ ფოტოში სიღრმის ამომცნობ ინფორმაციას პორტრეტული ფოტოსთვის, Pixel 2-ის ორმაგი პიქსელების და ჭკვიანური ალგორითმების ხარჯზე შესაძლებელი გახდა უკეთესი პორტრეტული ფოტოს გადაღების შესაძლებლობა ორმაგი კამერის სენსორების გარეშე. ეს ეხება წინა კამერასაც, სადაც ასევე შეგვიძლია გადავიღოთ დაბურულ ფონიანი ფოტოები.

Pixel 2 მუშაობს Qualcomm-ის უახლეს Snapdragon 835 პროცესორზე და გააჩნია 4GB ოპერატიული მეხსიერება, რომელსაც მხარს 64 ან 128GB შიდა მეხსიერება უჭერს (მოდელის მიხედვით).

Android-ის ვერსია უახლესი 8.0 Oreo არის და რა საკვირველია აქ სუფთა, უსწრაფესი სისტემაა, ისე, როგორც Google-ს შეეფერება. ახალი ფუნქციებიდან, დაემატა Always-On ეკრანი, რომელიც საათსა და შეტყობინებებს ანახებს, ფონურ რეჟიმში კი აქტიურია მიკროფონი და თუკი სმარტფონი თქვენს გარშემო მუსიკას იცნობს, Always On ეკრანი აჩვენებს სახელწოდებას.

დაემატა Google Lens - რომელიც ჩაშენებულია ფოტოებსა და Google Assistant-ში. ობიექტზე კამერის მიახლოებით სმარტფონს შეუძლია სამყაროს აღქმა, მაგალითად: ქალაქში ღირსშესანიშნაობების ამოცნობა, სავიზიტო ბარათებიდან ან სარეკლამო პოსტერებიდან ლოკაციების, ტელეფონის ნომრის, ელექტრონული ფოსტის ან სხვა ინფორმაციის ამოღება. ასევე შეიძლება ისეთი რამის ამოცნობა, როგორიცაა ძაღლის ან თუნდაც ყვავილის ჯიშიც კი. ეს ყველაფერი მიღწეულია ხელოვნური ინტელექტის კომპიუტერული ხედვით, რომელიც კომპანიამ ხელმისაწვდომი გახადა Pixel 2-ის მყიდველთათვის.

Pixel 2-ის ღირსება ასევე ბატარეაა, რის ოპტიმიზაციასაც Google-მა დიდი დრო დაუთმო. მცირე Pixel 2-ს 2,700 ხოლო Pixel 2 XL-ს 3,540 მილიამპერიანი ბატარეა აქვს, რის შედეგაც ის მთელ დღეს უპრობლემოდ გაძლებს, ხოლო თუკი დამუხტვაა საჭირო, სმარტფონს სწრაფი დამუხტვის მხარდაჭერა აქვს და 15 წუთში 7 საათიანი სამუშაო შეუძლია უზრუნველყოს.

Pixel 2 ხელმისაწვდომია სამ ფერში: “თითქოს ლურჯი” , “უბრალოდ შავი” და “აშკარად თეთრი”, ხოლო Pixel 2 XL ორ ფერშია: “უბრალოდ შავი” და “შავ თეთრი”, ფასებს რაც შეეხება, Pixel 2-ის ფასი 64GB ვერსიაში $649-ს, ხოლო 128GB ვერსიაში $749-ს შეადგენს. Pixel 2 XL-ის შემთხვევაში 64GB ვერსია $849-დან იწყება, ხოლო 128GB ვერსია $949 ღირს. ხელმისაწვდომი უკვე 19 ოქტომრიდან იქნება, წინასწარი შეკვეთები კი უკვე დაწყებულია.