Dec 4, 2017    სმარტფონები  huawei, Honor, Honor V10

Honor V10 - უფრო ხელმოსაწვდომი Mate 10 Pro

არც თუ ისე დიდი ხნის წინ Mate 10 Pro-ზე მოგიყევით - Huawei-ს უახლეს ფლაგმანურ სმარტფონზე, რომელშიც მსოფლიოში პირველადაა გამოყენებული ხელოვნური ინტელექტისა და ნეირული ქსელის მქონე პროცესორი. ეს ყველაფერი კარგია, თუმცა უნაკლო არაფერია. Mate 10 Pro-ს არ აქვს 3.5 მილიმეტრიანი ყურსასმენების შესაერთებელი და ვინაიდან პრემიუმ ფლაგმანური სმარტფონია, აქვს შესაბამისი ფასიც. რა იქნენოდა, თუკი ზუსტად ისეთივე მახასიათებლების მქონე სმარტფონი იარსებებდა, რომელსაც ცოტა დაბალი ფასი და 3.5მმ-იანი შესაერთებელი ექნებოდა? სწორედ ასეთია Honor-ის ახალი V10.

Honor V10-ში გამოყენებულია Mate 10 Pro-ს მსგავსი FullView ეკრანი, რომლის ზომა 5.99 ინჩს შეადგენს, ხოლო გვერდებზე წვრილი ჩარჩოები აქვს, 18:9 ეკრანის ხარჯზე კი ჩნდება “უჩარჩოობის” ტრენდული ილუზიაც. ერთადერთი გასხვავება Mate 10 Pro-ს ეკრანისგან არის ის, რომ Honor V10-ში ის LCD ტიპისაა Amoled-ის მაგივრად, აღსანიშნავია ასევე ისიც, რომ თითის ანაბეჭდი წინაა, ისევე როგორც ჩვეულებრივ (არა-Pro) Mate 10-ში.

პროცესორად ისევ Kirin 970-ია გამოყენებული, რომელშიც ხელოვნური ინტელექტის ნეირული ამაჩქარებელია მოთავსებული. ოპერატიული 6GB-ია, ხოლო შიდა 128GB, თუმცა არის უფრო იაფიანი 4/64 მოდელიც. მეხსიერების მხრივ, აქ ასევე ჰიბრიდული Sim ბარათის სლოტია, რაც ნიშნავს იმას, რომ შესაძლებელია მეხსიერების ბარათების გამოყენებაც.

კამერის მხრივ, აქ ორმაგი სენსორია 16 და 20 მეგაპიქსელით (ერთი RGB, ხოლო მეორე შავ-თეთრი), რომელთა დიაფრაგმები F/1.8-ს შეადგენს, თუმცა არ არის ოპტიკური სტაბილიზაცია. წინა კამერა 13 მეგაპიქსელიანია F/2.0 დიაფრაგმით. აღსანიშნავია, რომ ისევე როგორც Huawei-ს ფლაგმანურ სერიებში, აქ არ გვხვდება “Leica”-ს ბრენდინგი და წარწერა, თუმცა როგორც უკვე Honor-ის რამოდენიმე წლიანმა ისტორიამ გვიჩვენა, მათი კამერები პრაქტიკულად იდენტურია მათი Huawei-ს ტყუპისცალების. როგორც ზემოთ აღვნიშნე, სმარტფონი მუშაობს ნეირული ქსელით აღჭურვილ პროცესორზე, ამრიგად მის კამერას შეუძლია სხვადასხვა ობიექტების თუ სცენარების აღქმა, რის შემდეგაც ავტომატურად დაარეგულირებს პარამეტრებს.

უარყოფითი მხრიდან, არ არის წყალგაუმტარობა, ისევე როგორც Mate 10-შია (არა-Pro), ასევე ბატარეა უფრო მცირე მოცულობისაა და 3,750 მილიამპერს შეადგენს, თუმცა არის 5 ვოლტი / 4.5 ამპერიანი სწრაფი დამუხტვა.

Honor V10 ჯერ-ჯერობით ჩინეთში დაანონსდა $410 და $450 ფასებით (მეხსიერების სხვადასხვა მოდელების მიხედვით), თუმცა ის მალე ამერიკაშიც უნდა დაანონსდეს, კერძოდ კი 5 დეკემბერს.