Dec 28, 2017    სმარტფონები  huawei, honor 9, smartphone, Huawei Honor 9, Double camera

Huawei-მ Honor 9 Lite წარადგინა ორმაგი კამერითა და 18:9 ეკრანით

Huawei-მ წელს ძალიან ბევრი სმარტფონით გაგვანებივრა. იყო ეს ფლაგმანური კლასის ორი უმაღლესი დონის სმარტფონი, როგორიცაა P10 და Mate10 Pro, თუ საშუალო, ბიუჯეტური კლასის სმარტფონები, რომლებიც თავის ფასად ერთ-ერთ საუკეთესო არჩევნად რჩება ახლაც. საყურადღებოა Huawei-ს ქვე-ბრენდი Honor-იც, რომელიც ნელ-ნელა ამერიკის ბაზარზე იმკვიდრებს თავს და ძალიან ბევრ სიახლეს გვთავაზობს.

წინა-საახალწლოდ Huawei-ს ქვე-ბრენდმა Honor 9 Lite გამოუშვა, რომელიც საკმაოდ წარმატებული სმარტფონის, კომპანიის ფლაგმანური Honor 9-ის უფრო ხელმისაწვდომი და საშუალო კლასს შესაბამისი სმარტფონია, თუმცა ამავე დროულად რამდენიმე ნაბიჯით Honor 9-ზეც კი არის წინ, მაგალითად 2017 წლის დამახასიათებელი ისეთი პარამეტრი, როგორიც 18:9 ასპეკტური ფარდობის ეკრანია, რაც Honor 9-ს სამწუხაროდ არ აქვს.

Honor 9 Lite-ის ეკრანი 5.65 ინჩიანია, თუმცა ის კომპაქტურადაა ჩაშენებული 5 ინჩიანი ეკრანის ზომის სხეულში, ეს ყველაფერი კი 18:9 გაწელილი ფორმის დამსახურებაა. რეზოლუცია რა საკვირველია შესაბამისია დღევანდელ სტანდარტებს და Full HD+ შეადგენს.

წლევანდელი ტრენდებიდან სმარტფონს ასევე უკან ორმაგი კამერა აქვს განთავსებული, საიდანაც ერთი 13 მეგაპიქსელიანი, ხოლო მეორე 2 მეგაპიქსელიანია სიღრმის ამოცნობისთვის, რაც პორტრეტულ რეჟიმში გამოიყენება. Honor-ი ორი ნაბიჯით წინ წავიდა და წინა მხარეც აღჭურვა ორმაგი სენსორით, სადაც ასევე 13 და 2 მეგაპიქსელიანი კომბინაციაა სელფის გადაღებისთვის, სადაც ასევეა შესაძლებელი პორტრეტული სურათების გადაღება.

ტრენდულ კამერებთან ერთად, ტრენდული დიზაინიც არის, რომელიც შუშისაა უკანა მხარესაც, თუმცა ეს რა თქმა უნდა არ ნიშნავს იმას, რომ სმარტფონი უსადენო დამუხტვითაა აღჭურვილი, გვერდებიდან მას ალუმინის კანტი აკრავს და ის 4 ლამაზ ფერშია ხელმისაწვდომი: შავი, თეთრი, ლურჯი და ნაცრისფერი.

Honor 9 Lite აღჭურვილია Huawei-ს დამზადებული რვა ბირთვიანი Kirin 659 პროცესორით, რომლის ტაქტიკური სიხშირე 2.36 გიგაჰერცს შეადგენს. პროცესორს მხარს 3 ან 4GB ოპერატიული მეხსიერება უჭერს, რომელიც კონფიგურაციის მიხედვით იყიდება და ასევე შერჩევითაა შიდა 32 ან 64GB მეხსიერება, რომლის გაზრდა ასევე MicroSD ბარათითაა შესაძლებელი.

ბატარეა 3,000 მილიამპერიანია, არის Huawei-ს Super Charge ტექნოლოგიის მხარდაჭერაც, რომელიც სმარტფონს ნახევარ საათში დატენის 50%-მდე.

ფასს რაც შეეხება, სმარტფონი ჩინეთში $182-დან იწყება 3/32 კონფიგურაციაში, ხოლო 4/64 ვერსიაში მწარმოებელი $272-ს ითხოვს.