Dec 5, 2017    სმარტფონები  huawei, Mate 10 Lite

Huawei Mate 10 Lite გვთავაზობს 18:9 ეკრანს საშუალო საფასო კატეგორიაში

Huawei-ის საშუალო კლასის სმარტფონები სულ უფრო კომპეტენტური ხდება ფასისა და ხარისხის შეფარდების მხრივ. $300-იან საფასო კატეგორიაში უკვე ძალიან ბევრი სოლიდური სმარტფონი გვხვდება, თუმცა იშვიათად თუ გამოჩნდებიან ისეთები, რომლებიც ბაზარს სიახლეებით წინ წევენ. სწორედ ასეთია Huawei-ის საბოლოო გადაწყვეტილება საშუალო კლასში - Mate 10 Lite, რომელიც აღნიშნულ საფასო სეგმენტში მრავალ ინოვაციას გვთავაზობს, რასაც შემდეგ სხვა ბრენდების სმარტფონებშიც ვიხილავთ.

უკვე დიდი ხანია მივეჩვიეთ იმ ფაქტს, რომ საშუალო კლასშიც უნდა შეგვხვდეს მეტალის პრემიალური ანაწყობი და ორმაგი კამერები, თუმცა აღნიშნული სეგმენტისთვის სიახლე ახლა 18:9 ასპეკტური ფარდობის ეკრანია ვიწრო ჩარჩოებით, რაც დიდ ეკრანს ათავსებს სავსებით კომპაქტურ კორპუსში.

Mate 10 Lite-ის კორპუსი 7000 სერიის ალუმინისგანაა დამზადებული, წინა მხარეს კი სასიამოვნო ეფექტის მქონე 2.5D შუშა აქვს, რაც მას კიდევ უფრო პრემიალურს და ლამაზს ხდის. აქვე 5.9 ინჩიანი 1080P რეზოლუციის 18:9 ფარდობის ეკრანია, რაც როგორც უკვე აღვნიშნე, ძალიან დიდი სიახლეა აღნიშნულ სეგმენტში და სხვებისთვის სამაგალითო იქნება.

სმარტფონი მუშაობს Huawei-ს საშუალო კლასის Kirin 659 რვა ბირთვიან პროცესორზე, რომელსაც მხარს უჭერს 4GB ოპერატიული და 64GB შიდა მეხსიერება, რომლის გაზრდა ასევე ჰიბრიდული სიმ/მეხისერების ბარათის სლოტითაა შესაძლებელი.

აქ რა თქმა უნდა ვერ შევხვდებით Mate 10 Pro-ს ხელოვნურ ინტელექტს, თუმცა არის ბევრი სასიამოვნო ფუნქციაც. საწყისისთვის, ის მუშაობს Android 7.0 Nougat-ზე კომპანიის EMUI 5.1 ინტერფეისი ვერსიით, რომელიც დეკემბრის ბოლოში განახლდება Android 8.0 Oreo და EMUI 8.0-მდე. არის Mate 10 Pro-ს რამოდენიმე ფუნქცია, როგორიცაა მაგალითად ჭკვიანი თარგმანი, თუმცა თუკი Mate 10 Pro-ში ის მოწყობილობაზე ლოკალურად, ხელოვნური ინტელექტის დახმარებით მუშაობს, აქ ის ინტერნეტის დახმარებით მუშაობს მხოლოდ 7 ენაზე, თუმცა ამ ყველაფერთან ერთად გააჩნია განმასხვავებელი ფუნქციაც - მათემატიკის ამოცანებისა და მაგალითების ამომხსნელი, რომელიც განსაკუთრებულად გამოსადეგარი იქნება სტუდენტებისა და მოსწავლეებისთვის.

კამერას რაც შეეხება, მართალია ისინი Leica-ს მიერ სერტიფიცირებული არაა, თუმცა აქ უკანა მხარეს ორმაგი სენსორია, საიდანაც მთავარი სენსორი 16, ხოლო მეორე 2 მეგაპიქსელიანია, რომელიც გამოიყენება პორტრეტული ფოტოების გადაღებაში სიღრმის ინფორმაციის მოწოდებისათვის. აღსანიშნავია, რომ წინა მხარეს ასევე ორი კამერაა, საიდანაც ერთი სენსორი 13, ხოლო მეორე 2 მეგაპიქსელიანია, რაც ნიშნავს იმას, რომ წინა კამერითაც არის შესაძლებელი პორტრეტული ფოტოების გადაღება.