Feb 13, 2018    სმარტფონები  huawei, სმარტფონი, Apple, smartphone, iPhone X, Mate 10 Pro, მობილური, P series, P10, P10 Lite, P10 Plus, Animoj, ZOOMMER, ჰუავეი, Mobiluri

რას უნდა ველოდოთ Huawei P20-გან?

გასული წლის Huawei-ს P10-ების სერია საკმაოდ წარმატებული გამოდგა კომპანიისთვის. აღნიშნულ სერიაში გაერთიანებული იყო სამი სმარტფონი - P10, P10 Plus და P10 Lite, რომელთაგან ორი სხვადასხვა ზომის ფლაგმანი, ერთი კი ბიუჯეტური. მათ წარმატებამ განაპირობა Huawei-ს უმაღლეს დონეზე შესრულებულმა ანაწყობის ხარისხმა, განსაკუთრებით კი კამერებმა, რომლებიც კვლავ გერმანულ Leica-სთან იქნა შემუშავებული და საუკეთესო თუ არა, ერთ-ერთ ყველაზე სოლიდურ შედეგს იძლეოდა სხვა კამერაფონებს შორის.

2018 წელს კომპანია რა საკვირველია აგრძელებს P სერიას, თუმცა ახალი სერია არა იტერაციულად P11, არამედ P20-ის სახელს შეიძენს. უცნობია, თუ რატომ ასრულებს კომპანია ამხელა ნახტომს მოდელის ციფრებში, თუმცა საბოლოოდ არც ესაა ჯერ დადასტურებული.

სამაგიეროდ, დადასტურებულია სამივე სმარტფონის დიზაინი, თუ როგორ გამოიყურებიან და რა სახლეებს შემოგვთავაზებს კომპანია ძალიან მალე.

P20 სერიის დიზაინში ძალიან დიდი ცვლილებებია და შეიძლება ითქვას, რომ ეს დიდად დრამატული ცვლილება იქნება წინა წლების იტერატიულ დიზაინთან შედარებით, რომელიც გასულ წლებში Huawei-ს ინდივიდუალური დიზაინის დამახასიათებელი იყო. წელს, სმარტფონები მთლიანად შუშისგან იქნება დამზადებული, მსგავსად კომპანიის Mate 10 Pro-სა, თუმცა P20-ს რომ შეხედოთ, Mate სერიასთან აბსოლუტურად არაფერს იხილავთ, არამედ სულ სხვა კომპანია და მისი კონტროვერსიები მოგაგონდებათ.

დიახ, P20 სერიის სამივე სმარტფონი Apple-ის უახლეს სმარტფონს მოგაგონებთ, რადგან მათ iPhone X-ის მსგავსად შემოიღეს ჭრილიანი ეკრანი და ვერტიკალური კამერა. ორი დიზაინის ელემენტი, რომელიც iPhone X-ისთვისაა ყველაზე მეტად დამახასიათებელი. არავისთვის იყო საიდუმლო, რომ Huawei-ს სმარტფონების ინსპირაციის წყაროდ ყოველთვის Apple-ის ქმნილებები ხდებოდა, დაწყებული გარე დიზაინით და დამთავრებული შიდა ინტერფეისით, ასეა P20-ის შემთხვევაშიც.

P20 და P20 Plus-ის დიზაინიდან ყველაზე შესამჩნევი ვერტიკალურად განლაგებული არა ორი, არამედ სამი კამერაა, რომლებსაც შეეძლებათ 40 მეგაპიქსელიანი სურათების გადაღება და ხუთმაგი მიახლოვება.

ამ მომენტისთვის უცნობია ზუსტად, თუ რისთვის გამოიყენება და რა საჭიროა სამი ლინზა, თუმცა ისინი კვლავ Leica-სთან იქნება შემუშავებული და Mate 10 Pro-სავით ექნება ხელოვნური ინტელექტის ფუნქციები, როგორიცაა სცენების ინტელექტუალური ამოცნობა.

ინტელექტზე საუბრისას, აქ რა საკვირველია Huawei-ს ახალი პროცესორი იქნება გამოყენებული, რაც უკვე ვიხილეთ Mate 10 Pro-ში, რომელიც NPU ნეირული ქსელის ჩიპითაა აღჭურვილი.

P20 Lite-ი სერიის ყველაზე იაფი მოდელი იქნება უფროსი ძმებისგან განსხვავებით გამარტივებული ფუნქციონალით. აქ ასევე არა სამმაგი, არამედ ტრადიციული ორმაგი კამერა იქნება, თუმცა აღსანიშნავია ისიც, რომ P20 Lite-საც ექნება iPhone X-ის მსგავსი “კუნძული” ეკრანში.

სამივე სმარტფონის ეკრანის ჭრილში ჩაყენებული იქნება iPhone X-ის მსგავსი 3D სახის ამომცნობი სენსორი, რაც საშუალებას მოგცემს სმარტფონი არა თითის ანაბეჭდით, არამედ სახით გავხსნათ. აღსანიშნავია ასევე ის ფაქტიც, რომ P20 და P20 Plus-ს არ ექნებათ თითის ანაბეჭდის სენსორები და ისინი სრულად იქნება დამოკიდებული სახის ამომცნობ სისტემაზე. კომპანია ასევე აპირებს iPhone X-ის მსგავსი Animoji-ს შემოღებას, რომლის გაგზავნა მიმოწერებში იქნება შესაძლებელი.

Huawei თავისი ახალი სმარტფონების პრეზენტაციას MWC 2018-ზე აპირებდა, თუმცა Samsung-ის გამო უკან დაიხია და პრეზენტაცია 27 მარტზე გადადო. ინფორმაციაზე დაყრდნობით, P20-ები სწორედ ამ დღეს, პარიზში იქნება წარდგენილი სპეციალურ ღონისძიებაზე.