Apple

international warranty and more...

 Mar 13, 2018    სმარტფონები  huawei, სმარტფონი, smartphone, android, Oreo, Mate 10 Lite, Phone, ZOOMMER, ჰუავეი, ზუმერი, P smart, Type-C, Nougat, Y9, Huawei Y9, ტელეფონი

Huawei Y9 (2018) - მორიგი ბიუჯეტური 18:9 ეკრანის მქონე სმარტფონი

Huawei-მ რამოდენიმე დღის წინ კვლავ ახალი 18:9 ეკრანის მქონე ტელეფონი წარმოგვიდგინა ბიუჯეტურ კატეგორიაში - Huawei Y9 (2018), რომელსაც უკანა მხარეს ორმაგი კამერა აქვს და უახლეს Android Oreo-ზე მუშაობს. Y9 (2018)-ის დიზაინი თითქმის მთლიანად მეტალისგანაა შესრულებული, ზემოთ-ქვემოთ პოლიკარბონატის ჩარჩოებია განთავსებული. ისინი შესაძლოა ცოტათი არღვევენ ესთეტიურობას, თუმცა უფუნქციო არ არიან და ანტენის როლს თამაშობენ. არის ყურსასმენების შესაერთებელი ჯეკი და სმარტფონი Micro-USB პორტით იტენება ნაცვლად უახლესი Type-C-ისა, თუმცა ბიუჯეტურ კლასში ეს სავსებით საკმარისია. თითის ანაბეჭდი ტრადიციულად უკანაა განთავსებული და კომპანიის ცნობით, აქ მათი ერთ-ერთი ყველაზე სწრაფი თითის ანაბეჭდის სენსორია, რომელიც 0.3 წამში ხსნის ტელეფონს, რაც ბიუჯეტური კლასისთვის შთამბეჭდავია. წინა მხარეს ტრენდული 18:9 ასპეკტური ფარდობის IPS ეკრანია, რომელიც 5.93 ინჩიანია და 2160 x 1080 რეზოლუცია გააჩნია. ამხელა ეკრანი დაფარულია Gorilla Glass შუშით (ზუსტი ვერსია უცნობია) და გვერდებზე 2.5D მომრგვალებულობის ეფექტი აქვს, რაც სმარტფონს პრემიალობის გრძნობას უმატებს.

Y9 (2018) მუშაობს Huawei-ს საშუალო კლასის Kirin 659 პროცესორზე, რომელიც ასევე კომპანიის Mate 10 Lite, P Smart და სხვა სმარტფონებში გამოიყენება. პროცესორმა უკვე მიიღო ერთ-ერთი ყველაზე ენერგო-ეფექტურის წოდება, ამრიგადაც ბატარეა ცუდი ნამდვილად არ უნდა იყოს. პროცესორს მხარს 3GB ოპერატიული და 32GB შიდა მეხსიერება უჭერს, თუმცა მისი გაზრდა რა საკვირველია შესაძლებელია MicroSD ბარათის საშუალებით. სლოტი ჰიბრიდულია და მომხმარებელს არჩევანის გაკეთება მოუწევს მეხსიერების ბარათსა და მეორე სიმ ბარათს შორის. კამერა როგორც უკვე აღვნიშნეთ, ორმაგია, საიდანაც მთავარი სენსორი 16 მეგაპიქსელიანი, ხოლო მეორე დამხმარე 2 მეგაპიქსელიანია ისევე როგორც P Smart-ში და პორტრეტულ სურათებში სიღრმის აღსაქმელად გამოიყენება. წინა მხარეს 13 მეგაპიქსელიანი სელფის კამერაა, რომელსაც მეორე კამერის გარეშე შეუძლია პორტრეტული ფოტოების გადაღება, პროგრამული დამუშავებით. სმარტფონს 4,000 მილიამპერიანი ბატარეა აქვს, რაც საგრძნობლად აღემატება Mate 10 Lite-ის 3,340-სა და P Smart-ის 3,300 მილიამპერს. სამწუხაროდ არაა სწრაფი დამუხტვის საშუალება, თუმცა ასეთ ფასში მას არც უნდა ველოდოთ. ის ასევე Android Oreo-ზე მუშაობს ყუთიდანვე, რაც Mate 10 Lite-ის შემთხვევაში არაა, რომელიც Nougat-ზეა ჯერაც. Huawei Y9 (2018) მარტის ბოლოს ჩაეშვება გაყიდვაში, ფასი სამწუხაროდ უცნობია.