Sep 13, 2017    სმარტფონები  Apple, iPhone X, iPhone

iPhone X - Apple-ის მომავლის სმარტფონი

მოგეხსენებათ, Apple-მა გუშინ კუპერტინოში, Steve Jobs-ის თეატრში ჩაატარა პრეზენტაცია, სადაც ნაჩვენები იყო iPhone 8 და 8 Plus, რომლის შესახებ წინა პოსტში მოგიყევით, თუმცა შოუს უმთავრესი ვარსკვლავი იყო უახლესი iPhone-ი, რომელიც შექმნილია სპეციალურად, პირველი, 2007 წლის iPhone-ის ათი წლის იუბილეს აღსანიშნავად.

ეს არის Apple-ის მეათე თაობის iPhone-ი - iPhone X (ათი)!

iPhone X-ში ასახულია Apple-ის მთელი ინოვაცია, რომელზეც კომპანია წლების განმავლობაში მუშაობდა. აქ მოთავსებულია ყველაფერი საუკეთესო, რაც კი კომპანიას გააჩნია დღესდღეობით.

სმარტფონი იყენებს Samsung-ის წარმოების AMOLED ეკრანს, რაც კომპანიისთვის დიდი მიღწევაა, რადგან აქამდე OLED ტიპის ნაცვლად, Apple-ი LCD ეკრანებს იყენებდა. ახალ ეკრანს Super Retina Display ეწოდება, ის 5.8 ინჩიანია და გააჩნია 1,125 x 2,436 რეზოლუცია 458ppi პიქსელთა სიმჭიდროვით, რაც მას ყველაზე მაღალ გაფართოებიან iPhone-ს ქმნის ისტორიაში. მას ასევე HDR 10-ისა და Dolby Vision სტანდარტების მხარდაჭერა აქვს, 1:1,000,000-თან შეფარდების კონტრასტი და რა თქმა უნდა 3D Touch-ი.

წინა ნაწილზე განთავსებული ეკრანი ბოლომდე უჩარჩო მაინც არაა. მის ზემოთ განთავსებულია სენსორთა პანელი, სადაც იმალება: ილუმინატორის, წერტილოვანი პროექტორის, მიახლოების, გარე შუქის, სახის ამოცნობის სენსორი, დინამიკი, მიკროფონი, და წინა ორმაგი კამერა.

აღსანიშნავია, რომ სახლის ღილაკი გამქრალია და ჩანაცვლებულია ჟესტური მართვით ვირტუალური ხაზოვანი ღილაკის ხარჯზე. სახლში გასვლისათვის ახლა ზემოთა აწევის ჟესტის შესრულებაა საჭირო, დახურული აპლიკაციების გახსნისათვის ისევ ზემოთა აწევა, თუმცა შუაში გაჩერებით, ხოლო Siri-ს გამოძახება გვერდითა ღილაკით ხდება, რომელიც ახლა ორჯერ უფრო გრძელია და მასზე ღრმა დაჭერით ვირტუალური ასისტენტი გამოიძახება.

ძალიან ბევრს გაუჩნდება კითხვა, თუ სად წავიდა TouchID - თითის ანაბეჭდის სენსორი. ბევრს ეგონა, რომ ის უკან განთავსდებოდა, თუმცა არა, Apple-მა ის საერთოდაც მოაშორა და მის ნაცვლად ჩააშენა სახის ამომცნობი 3D ტექნოლოგია, რომელიც ახალი A11 Bionic ნეირული, ხელოვნური ინტელექტის მქონე პროცესორის ხარჯზე იმდენად უსაფრთხოა, რომ Apple-ი ის ბანკებსაც კი ანდო მობილური Apple Pay გადახდებისთვის.

FaceID მუშაობს სრულ სიბნელეშიც. ყოველი სკანირებისას, ის 30,000 უჩინარ წერტილს “ისვრის” სახეზე, ეს ინფორმაცია კი ნეირულ ჩიპს გადაეცემა, რომელიც ამოწმებს მსგავსებებს.

ეკრანის ზედა ორ ჭრილში განთავსებულია iOS-ის ჩვეული ინფორმაცია. მარცხენა კუთხეში დრო არის, ხოლო მარჯვენაში ბატარეა და სტატუსის ინდიკატორები. Control Center-ის გამოძახებისთვის, საჭიროა მაჯვენა ჭრილიდან თითის ჩამოსმა, ხოლო შეტყობინებები მარცხენაშია.

სახის ამომცნობი ასევე მუშაობს Animoji-სთვის. ამიერიდან შესაძლებელია Emoji-ების უფრო ხალისიანად გამოყენება. სმარტფონი სახეს ასკანირებს, ხოლო Animoji თქვენს მოძრაობებს იმეორებს.

iPhone X-ის გვერდები უჟანგავი ფოლადისგანაა დამზადებული, უკანა პანელი კი შუშისგან, რათა სმარტფონის უსადენო დამუხტვა მოხერხდეს, ისევე როგორც iPhone 8 და 8 Plus-ში.

უკანა კამერა ორმაგია 7 Plus/8 Plus-ივით, სადაც ერთი ჩვეულებრივი 12MP სენსორია f/1.8 დიაფრაგმით, ხოლო მეორე ტელეფოტო სენსორია f/2.4 დიაფრაგმით. რა საკვირველია არის პორტრეტული რეჟიმიც, რომელიც გაუმჯობესებული იქნა და სიღრმეებს აღიქვამს თავის ეფექტებთან ერთად. რადგანაც წინ ორი კამერაა განთავსებული, მართალია ერთი სელფისთვის გამოიყენება, ხოლო მეორე სახის სკანირებისთვის, თუმცა Apple-მა ის უყურადღებოდ არ დატოვა და ფუნქციონალიც შემატა. მეორე წინა კამერა ახლა სიღრმის გამოსათვლელი ინფორმაციისთვის გამოიყენება, ამრიგად პორტრეტული რეჟიმის ფოტო ახლა წინა კამერითაც შეგვიძლია გადავიღოთ.

ბატარეის მილიამპერაჟი ჯერ-ჯერობით უცნობია, თუმცა დიდი ალბათობით Apple-ი შიგნიდან ინოვაციურ L ფორმის ბატარეას იყენებს, რომელიც iPhone 7-ის მოხმარებასთან შედარებით 2 საათითაა გაზრდილი.

ხელმისაწვდომობას და ფერებს რაც შეეხება, iPhone X მხოლოდ და მხოლოდ კლასიკურ ფერებშია ხელმისაწვდომი, როგორიცაა Space Grey და Silver, მეხსიერება 64 და 256GB არის ისევე როგორც iPhone 8-ში, ფასი კი 64GB-იან მოდელში $999-დან იწყება, 256GB-იანი კი $1,199.

iPhone X-ის წინასწარი შეკვეთები დაიწყება 27 ოქტომბერს, ხოლო გაყიდვაში ჩაეშვება 3 ნოემბერს.