Aug 10, 2017    სმარტფონები  სმარტფონები, სიახლეები, Lenovo, K8 note, ლენოვო

Lenovo-მ თავისი პირველი სმარტფონი გამოუშვა სუფთა Android-ით

მიუხედავად იმისა, რომ Lenovo ახლა ფლობს Motorola-ს და მას აფინანსებს სმარტფონების წარმოებაში, კომპანია მაინც უშვებს თავის სმარტფონებს, რომლებიც, ძირითად შემთხვევაში, დაბალბიუჯეტურ სეგმენტშია და საშუალო კლასს ძალიან დიდი სიძნელით აღწევს.

კომპანია თავის სმარტფონებს ყოველთვის Lenovo-ს Vibe UI ინტერფეისით უშვებდა, რომელიც ძალიან მსგავსია იმასთან, თუ რას გვთავაზობს Huawei ან Xiaomi. ჩინური მწარმოებლებისთვის უკვე ტრადიციადაა ქცეული Apple-ის iOS-დან უმთავრესი ელემენტების გადმოღება, როგორიცაა დიზაინი და ზოგადი სისტემის გამოცდილება.

ჩინეთში ასეთი ინტერფეისები პოპულარულია და საზოგადოება ვერც კი აღიქვამს სუფთა Android-ს, თუმცა ამერიკასა და ევროპაში საქმე სულ სხვაგვარადაა. აქ ხალხი უპირატესობას 80% შემთხვევაში ანიჭებს Google-ის სუფთა სისტემას. Lenovo-მ დეტალურად შეისწავლა ბაზარი და ამერიკასა და ევროპაში როგორც იქნა უარი თქვა Vibe UI ინტერფეისზე და დაგვპირდა, რომ ყველა სამომავლო სმარტფონს სუფთა Android-ის სისტემა ექნება, რომელიც საკმაოდ ოპერატიულად მიიღებს უახლეს განახლებებს.

კომპანიის პირველი სმარტფონი სუფთა Android-ის 7.1.1 სისტემით სწორედაც K8 Note გახდა, რომელიც საშუალო კლასის კატეგორიას ეკუთვნის, კომპანია კი მას თავის ფასში “კილერს” უწოდებს.

საწყისისთვის, დიზაინი შესრულებულია Unibody ალუმინის კორპუსში და განსაკუთრებით კარგად გამოიყურება “ვენომურ შავ” ფერში. მის წინა მხარეს განთავსებულია 5.5 ინჩიანი Full HD IPS ეკრანი 401 პიქსელთა სიმჭიდროვით, მუშაობს Mediatek-ის Helio X23 პროცესორზე გააჩნია 32 ან 64GB შიდა მეხსიერება, ოპერატიული კი 3 ან 4GB (ვარიანტის მიხედვით), ამ ყველაფერს კი ენერგიას 4,000 მილიამპერიანი ბატარეა აძლევს, რაც უდავოდ ძალიან კარგია.

კამერას(ებს) რაც შეეხება, წინა მხარეს 13 მეგაპიქსელიანი სელფის კამერაა, ხოლო უკან ორმაგი კამერაა განთავსებული, რომელთაგან ერთი 13 მეგაპიქსელიანია, ხოლო მეორე 5 მეგაპიქსელიანი, რომელიც გვაძლევს საშუალებას გამოვიყენოთ აპერტურის რეჟიმი და ფოტოებს სიღრმე შევმატოთ ე.წ “ბოკეს ეფექტით”.

რა საკვირველია, აქ არის თითის ანაბეჭდის სენსორი, თუმცა ერთადერთი უარყოფითი მხარე არის ის, რომ სმარტფონს Micro-USB შესაერთებელი უერთდება და არა უახლესი Type-C.

როგორც უკვე აღვნიშნე, K8 Note ორ ვერსიაში იქნება, საიდანაც 32/3GB ვერსია ~$203-ად გაიყიდება, ხოლო 64/4GB ვერსია ~$219-ად. ხელმისაწვდომობას რაც შეეხება, სმარტფონი 18 აგვისტოს ჩაეშვება გაყიდვაში.