Nov 3, 2017    ლეპტოპები  Microsoft, Surface Book 2

Microsoft-ის ახალი Surface Book 2

გასული წლის Surface Book-ი Microsoft-ისთვის ძალზედ გამართლებული პროდუქტი გამოდგა. ეს იყო კომპანიის პირველი ლეპტოპის მსგავსი ფორმ-ფაქტორის მოწყობილობა, რომელიც ამავდროულად ტაბლეტიც იყო. ახერხებდა ამას სპეციალური ჩამკეტი სისტემის მეშვეობით, რომელიც აერთებდა მოწყობილობის ეკრანისა და კლავიატურის ნაწილს.

ეკრანის მხარეს გამოცალკევებული იყო პროცესორი, ხოლო კლავიატურაში ჩაშენებული იყო გრაფიკული პროცესორი. ამ ორის შეერთების დროს ვიღებდით საკმაოდ სოლიდურ ლეპტოპს, რომლის პროცესორისა და ვიდეო ამაქჩქარებლის შერწყმა გვაძლევდა გრაფიკულ სიძლიერეს, რომლის მეშვეობით შეიძლებოდა გრაფიკულად ინტენსიური თამაშების თამაში და ვიდეო ედითი.

Surface Book 2-ში კომპანიამ ტაბლეტისა და ლეპტოპის ერთ ფორმაში არსებული კონცეფცია არ შეცვალა, არამედ გააუმჯობესა და ახალი მოდელიც შემატა, კერძოდ კი ახლა Book 2-ის ხაზში 13.5 ინჩიან მოდელს შეემატა 15 ინჩიანიც, რაც მოწყობილობას კიდევ უფრო კონკურენტუნარიანს გახდის Apple-ის MacBook Pro ლეპტოპებთან.

ახალი ლეპტოპები, როგორც უკვე აღვნიშნე, 13.5 და 15 ინჩიან ზომებშია, თუმცა რეზოლუცია განსხვავებული აქვთ. 15 ინჩიანზე ის 3240 x 2160-ია 260 პიქსელთა სიმჭიდროვით, ხოლო 13.5 ინჩიანზე 3000 x 2000-ია 267 PPI სიმჭიდროვით.

15 ინჩიანი ვერსია მე-8 თაობის ოთხ ბირთვიან Intel Core i7-8650U-ზე მუშაობს 4.2GHz "max turbo” სიხშირით, გააჩნია 16GB ოპერატიული და 256GB, 512GB ან 1TB შიდა მეხსიერებით. ვიდეო ბარათის სლოტში მოქცეულია Nvidia GeForce GTX 1060, 6GB გრაფიკული მეხსიერებით, რაც უდავოდ ძალიან კარგია ასეთი ფორმ-ფაქტორის მოწყობილობისთვის, რომელიც სულ რაღაც 20მმ არის სიგრძეში და იწონის 1.9 კილოგრამს ლეპტოპის რეჟიმში და 800 გრამს ტაბლეტის რეჟიმში.

მომცრო 13.5 ინჩიანი მოდელის შუათანა მოდელი მეშვიდე თაობის Intel Core i5-7300U პროცესორზე მუშაობს 8GB ოპერატიული მეხსიერებით, თუმცა შესაძლებელია ერთი ნაბიჯით მაღალი და დაბალი მოდელების ყიდვაც, როგორიცაა: მერვე თაობის Intel 8 ბირთვიანი i7-8650U, 4.2GHz "max turbo” 16GB ოპერატიულითა და 256GB/512GB ან 1TB შიდა მეხსიერებით.

ტრადიციულად, ვიდეო დაფა კლავიატურაში, ხოლო პროცესორი ეკრანშია განთავსებული და შესაძლებელია მათი განცალკევება, რაც საშუალებას მოგვცემს მოწყობილობა უფრო პორტატულ და მოსახერხებელ ტაბლეტის რეჟიმში გამოვიყენოთ, რაც მშვენიერია ფილმების ყურებისას ან უბრალოდ სოციალურ ქსელებში დათვალიერებისას.

ორივე ლეპტოპს 17 საათიანი ბატარეა აქვთ, Bluetooth 4.1, 2 ცალი USB-A, USB-C, SD ბარათის სლოტი და ყურსასმენების ჯეკი. წინ 5MP კამერაა განთავსებული, ხოლო უკან 8MP, რომლებსაც Windows Hello სახის ამოცნობა შეუძლიათ.

ფასების მხრივ, 13 ინჩიანი მოდელი ყველაზე დაბალ კონფიგურაციაში $1,499-დან იწყება, ხოლო 15 ინჩიანი მოდელი $2,499-დან.