Aug 4, 2017    სმარტფონები  სიახლეები, მოტოროლა, Moto G5S Plus

Motorola-მ “სპეციალური გამოშვების” Moto G5s და G5s Plus წარადგინა

არც თუ ისე დიდი ხნის წინ, კერძოდ კი თებერვალში, Motorola-მ თავისი ბიუჯეტური G სერია განაახლა და წარადგინა Moto G5 და Moto G5 Plus-ი, რომლებიც თავიანთ ფასში ძალიან კარგი სმარტფონები გახლდათ, თანაც G სერიაში პირველები იყვნენ, რომლებმაც ამ საფასო კატეგორიაში მომხმარებელს მეტალის ანაწყობი შესთავაზეს, თუმცა აღსანიშნავია, რომ ორივე სმარტფონში მეტალის მხოლოდდამხოლოდ უკან ამოჭრილი ჩარჩო იყო, გვერდები კი სრიალა პოლიკარბონატისაა, რომელიც ხელში არც თუ ისე სასიამოვნოდ იგრძნობოდა და ზუსტად ეგ იყო სმარტფონების უდიდესი მინუსი.

ამჯერად, Motorola-მ 2017 წლის G სერიას ახალი “სპეციალური გამოშვების” სმარტფონები შემატა - Moto G5s და Moto G5s Plus-ი, რომლებშიც სტანდარტული G5-ისა და G5 Plus-ის ყველა უარყოფითი მხარეა გამოსწორებული, ისინი თავიდან ბოლომდე ალუმინის დიზაინშია შეკრული და მეტალის ერთი ფირფიტისგან დამზადებული, ზემოდან კი ახლა 2.5D მომრგვალებული შუშა აკრავთ, თუმცა სიახლეები აქ არ მთავრდება.

Moto G5s Plus

ორი მოდელიდან, ეს სმარტფონი უფრო მაღალი კლასისაა. როგორც უკვე აღვნიშნე, მას მთლიანად მეტალის კორპუსი გააჩნია. ეკრანი ახლა 5.5 ინჩიანია, ნაცვლად 5.2-ისა. G5S Plus-ში, პროცესორად ისევ კარგად გამოცდილი და ენერგო-ეფექტური Snapdragon 625-ია, რომელიც ძალიან დიდი სისწრაფითა და ოპტიმიზაციით გამოირჩევა, ოპერატიული მეხსიერება 3 ან 4GB-ია, ხოლო შიდა მეხსიერება 32 ან 64GB. ბატარეა ისევ 3000 მილიამპერიანია, თუმცა ენერგო-ეფექტული პროცესორის ხარჯზე ეს სავსებით საკმარისია.

ერთი შეხედვით, G5 Plus-დან არაფერი შეცვლილა, თუმცა მთავარი ცვლილება კამერაშია, უფრო სწორედაც კი - კამერებში, რადგან აქ ახლა ორმაგი კამერაა, რაც Motorola-სთვის ასეთ საფასო კატეგორიაში პირველადაა. ერთი კამერის სენსორი ფერადია, მეორე კი მონოქრომული, რის შედეგად შეძლებთ გადაიღოთ უფრო დეტალური და ნათელი ფოტოები, ამასთან ერთად კი ნატივური შავ-თეთრი ან პორტრეტული რეჟიმის ფოტოები გადაიღოთ. გაუმჯობესდა ასევე წინა კამერა, რომელიც 5 მეგაპიქსელიანი f/2.2 სენსორიდან 8 მეგაპიქსელიან f/2.0 სენსორამდე გაიზარდა, ასევე დაემატა წინა LED განათებაც.

Moto G5s

სტანდარტული Moto G5-ისგან განსხვავებით, Moto G5s-ს აქვს მთლიანად მეტალისგან დამზადებული კორპუსი, ეკრანის ზომა გაეზარდა 5.2 ინჩამდე, ბატარეა კი 2800 მილიამპერიდან 3000 მილიამპერზე ავიდა.

პროცესორი ისევ Snapdragon 430-ია, თუმცა ოპერატიული მეხსიერება ახლა 3GB-ია, ხოლო შიდა - 32, რაც აღემატება სტანდარტულის 2/16 კონფიგურაციას. კამერა ახლა 16 მეგაპიქსელიანია f/2.0 აპერტურით, წინა კამერა კი 5 მეგპიქსელიანია და დაემატა განათებაც.

ორივე სმარტფონს აქვს Motorola-ს სწრაფი TurboCharging დამუხტვა და ყუთიდანვე აყენია უახლესი Android 7.1.1, რომელიც გარანტირებულად განახლდება Android 8.0-ზე.

ფასებს რაც შეეხება, G5s ეღირება €249, ხოლო G5s Plus-ი €299, რაც დაახლოებით 10%-ით აღემატება არსებული G5/G5 Plus-ის ფასებს, რაც უდავოდ ძალიან კარგია.