Jan 11, 2018    სმარტფონები  smartphone, nokia, android, Nokia 6

Nokia-მ განახლებული Nokia 6 2018 გამოუშვა

გასულ წელს HMD Global-ის შვილობილი Nokia დაუბრუნდა Android სივრცეს თავისი ახალი სმარტფონებით, რომლებიც აწყობის უმაღლეს ხარისხზე და სუფთა პროგრამულ უზრუნველყოფაზეა ორიენირებული. ფლაგმანურ სეგმენტში თუ არა, საშუალო კლასისა და ბიუჯეტურ სეგმენტში Nokia-მ უკვე დიდ წარმატებას მიაღწია, ამ ყველაფრის დამსახურება კი Nokia 6 იყო, რომელიც თავის ფასში უკონკურენტო იყო.

ახალი წელი Nokia-მ ახალი სმარტფონით აღნიშნა, ეს პირდაპირი სიქველია გასული წლის Nokia 6-ის, თუმცა სახელში როგორც ჩანს კომპანიას დიდი ცვლილებების შეტანა არ სურს და მხოლოდ წელს უწერს, ეს არის Nokia 6 2018.

ტექნიკური მახასიათებლებით რომ დავიწყოთ, ახალ Nokia 6-ს განახლებული პროცესორი აქვს, რომელიც ახლა Qualcomm-ის საშუალო კლასს მიეკუთვნება და არა ბიუჯეტურს, როგორც ეს გასულ წელს იყო. Snapdragon 430-ის ნაცვლად ახლა აქ განახლებული Snapdragon 630-ია, რომელიც 625-ის გაუმჯობესებულია პროცესორია კიდევ უფრო კარგი ენერგო-ეფექტურობით. მას ახლა 4GB ოპერატიული მეხსიერება აქვს, ნაცვლად 3-ისა, რაც გასულ წელს იყო. აღსანიშნავია ასევე ისიც, რომ სმარტფონი როგორც იქნა აღიჭურვა USB Type-C სტანდარტით. 2018 წელს უცნაურიც იქნებოდა, ისევ Micro-USB რომ ჰქონოდა. ოპერატიულის გარდა, გაიზარდა შიდა მეხსიერებაც და ახლა ის 64-ს შეადგენს.

დანარჩენი თითქმის უცვლელი დარჩა. წინა ნაწილზე ისევ 5.5 ინჩიანი IPS LCD ეკრანია 1080P რეზოლუციით, თუმცა აღსანიშნავია, რომ თითის ანაბეჭდის სენსორმა უკანა მხარეს, კამერის ქვემოთ გადაინაცვლა. წინა ნაწილი კი ყველანაირი ფიზიკური ღილაკისა თუ სენსორებისგან გათავისუფლდა, აწი აქ Android-ის ჩვეული ნავიგაციის ღილაკებია. შენარჩუნებულია ასევე ყურსასმენების ჯეკიც, რაც უდავოდ მისასალმებელია. Android-ის სისტემა ტრადიციულად სუფთაა, გარდა ამისა სმარტფონს ყუთიდანვე Android 8.0 Oreo აქვს დაყენებული, რაც ნიშნავს იმას, რომ ლოდინი სულაც არაა საჭირო!

კამერა თითქმის იგივეა, რაც წინა წელს. უკანა მხარეს ისევ გვაქვს 16 მეგაპიქსელიანი სენსორი 1.0um პიქსელის ზომით და f/2.0 დიაფრაგმით, წინა ნაწილზე კი 8 მეგაპიქსელიანი კამერაა 1.12um პიქსელის ზომითა და f/2.0 დიაფრაგმით. სიახლე წელს Bothie არის, ისევე როგორც ფლაგმანურ Nokia 8-ში, რაც საშუალებას გვაძლევს ორივე კამერიდან გადავიღოთ ფოტო და ვიდეო.

Nokia 6 2018 გაყიდვაში ჯერ-ჯერობით მხოლოდ ჩინეთშია, ხოლო ძალიან მალე ხელმისაწვდომი ამერიკასა და ევროპაშიც გახდება. მისი ფასი სულ რაღაც 230$-ს შეადგენს.