Dec 19, 2017    სმარტფონები  smartphone, Panasonic

Panasonic-მა Eluga C წარმოადგინა სამმხრივი უჩარჩო ეკრანითა და ორმაგი კამერით

Panasonic-ის სმარტფონები არასოდეს ყოფილა პოპულარული ან თვალწარმტაცი მაშინ, როდესაც ბაზარზე ძალიან ბევრი A ბრენდი დომინირებს. კომპანია მეტწილად საშუალო ან უფრო ხშირად ბიუჯეტური სმარტფონების წარმოებით არის დაკავებული, რომლებიც ძირითადად მხოლოდ აზიის ბაზარზეა სახელგანთქმული. სწორედ ამის გამო, Panasonic-ს სურს თავისი სმარტფონები უფრო შესამჩნევი გახადოს და ამიტომაც, რამოდენიმე დღის წინ გამოუშვა ახალი სმარტფონი, რომელიც ძალიან ცდილობს კონკურენცია 2017 წლის უჩარჩო ფლაგმანებს გაუწიოს, როგორიცაა: Galaxy S8, Note8, iPhone X და სხვა, ხოლო ამათ თუ ვერა, Xiaomi Mi Mix-ს ან Sharp Aquos Crystal-ს მაინც, რადგან მისი დიზაინი სწორედ ამ ორი სმარტფონის მსგავსია.

Panasonic Eluga C-ს სამი მხრიდან გააჩნია ვიწრო ჩარჩოები, რომლებიც იდენტურია Xiaomi Mi Mix-ისა და Sharp Aquos Crystal-ის დიზაინის, სადაც სმარტფონებს ქვედა მხარეს აქვთ საკმაოდ სქელი ჩარჩო, სადაც რა საკვირველია ეკრანის დრაივერები და წინა 8 მეგაპიქსელიანი, f/2.2 დიაფრაგმის მქონე კამერაა მოთავსებული. წინა კამერის ქვედა მხარეს ასეთი განთავსება საკმაოდ მოუხერხებელია, რადგან ჩვენი სახის ნაცვლად მეტწილად ნიკაპი ჩანს, თუმცა კამერაში ჩაშენებული პროგრამული უზრუნველყოფა გვაძლევს საშუალებას ტელეფონი ამოვატრიალოთ და ჩვეულად გადავიღოთ სელფი.

წინა მხარესვე 5.5 ინჩიანი ეკრანია, რომლის შეფარდება სმარტფონის ტანთან 84.6%-ს შეადგენს. რეზოლუცია შესანიშნავიდან ძალიან შორსაა, მხოლოდ და მხოლოდ 720p HD, რაც 300ppi-ზე ნაკლებია, თუმცა დადებითიდან, ის საკმაოდ კაშკაშაა და ჯამში 450 კანდელს გვაძლევს, რის დახმარებითაც სმარტფონის ხილვადობა გარეთ არც თუ ისე ცუდი იქნება. ქვედა კანტზე თითის ანაბეჭდის სენსორი და სახლში დაბრუნების ღილაკია, რომელიც, მწარმოებლის თქმით, 0.3 წამში უნდა განბლოკოს მოწყობილობა.

ეს ყველაფერი მუშაობს Mediatek-ის საკმაოდ ძველ, 28 ნანომეტრიან MT6750T პროცესორზე, რომელსაც მხარს 4GB ოპერატიული და 64GB შიდა მეხსიერება უჭერს. არის MicroSD ბარათის მხარდაჭერა, თუმცა ჯერ-ჯერობით უცნობია ეს ჰიბრიდული სლოტია და გვაძლევს თუ არა საშუალებას ავირჩიოთ MicroSD ბარათი თუ საერთოდაც მეორე სიმ ბარათი.

უკანა მხარეს ორმაგი კამერაა, საიდანაც ერთი 13 მეგაპიქსელიანი, ხოლო მეორე 5 მეგაპიქსელიანი სენსორია. ორივე f/2.2 დიაფრაგმას იყენებს, რაც არც თუ ისე კარგია დღეს-დღეობით ბნელი სიტუაციებისთვის. ვინაიდან სმარტფონი Mediatek-ის ძველ პროცესორზე მუშაობს, ის ზღუდავს კამერის შესაძლებლობებს და მაქსიმუმ 1080P ვიდეოს აღებინებს 30 კადრი წამში სიჩქარით.

ბატარეა 3,000 მილიამპერიანია, კომპლექტაციაში კი ნელი 7.5 ვატიანი დამტენი მოყვება, სმარტფონს კი საერთოდ არ აქვს სწრაფი დამუხტვის მხარდაჭერა.

ამჟამად Eluga C-ზე წინასწარი შეკვეთები მიმდინარეობს. მისი ფასი $200-ს შეადგენს.