Jan 11, 2018    სმარტფონები  smartphone, android, Sony, Sony XA1, Phone

Sony-მ Xperia XA2 და XA2 Ultra წარადგინა

CES 2018-ისთვის Sony-მ ორი ახალი სმარტფონით გაახარა ფანები - Xperia XA2 და XA2 Ultra, რომლებიც კომპანიის საშუალო კლასს მიეკუთვნება და პირდაპირი შთამომავალია Xperia XA და XA1 სმარტფონების, რომლებსაც კიდიდან კიდემდე გადაჭიმული ეკრანი ჰქონდათ და Sony-სთვის დამახასიათებელი მოოთხკუთხედო დიზაინი.

XA1-ში გამოყენებული Loop დიზაინი ისევ არის შენარჩუნებული XA2-შიც, თუმცა ის გაუმჯობესდა და უფრო მომრგვალებული და ოვალურია, რაც კომპანიის თქმით, ხელში დაჭერა საგრძნობლად უნდა გაამარტივოს. აღსანიშნავია ის ფაქტიც, რომ XA2-ში ახლა თითის ანაბეჭდია გამოყენებული, თუმცა ის Sony-თვის არატრადიციულ ადგილას, უკანაა განთავსებული ნაცვლად გვერდისა, სადაც იყო ხოლმე, თუმცა კომპანიას მოუწია ლოკაციის შეცვლა, რათა ამერიკის ბაზარზე ისევ შეიტანოს სმარტფონი (გვერდითა განთავსების და პატენტების დარღვევის გამო Sony ვერ ყიდდა სმარტფონებს ამერიკის ბაზარზე).

წინა მხარეს XA2-ს 5.2 ინჩიანი Full HD რეზოლუციის ეკრანი აქვს, ხოლო XA2 Ultra-ს იმავე რეზოლუციის 6 ინჩიანი ეკრანი, რომელიც დაფარულია Gorilla Glass დამცავი შუშით. ორ სმარტფონს შორის ყველაზე დიდი სხვაობა წინა კამერაა, რომელიც XA2-ში ერთია, 8 მეგაპიქსელიანი f/2.4 სენსორია 120° ხედვის კუთხით, ხოლო XA2 Ultra-ში ორმაგი წინა კამერაა, რომელიც იმავე 8 მეგაპიქსელიანი ფართო კუთხოვანი და 16 მეგაპიწსელიანი 88 გრადუსიანი კამერისგან შედგება. მთავარ კამერას რაც შეეხება, აქ გამოყენებულია 23 მეგაპიქსელიანი Exmor RS კამერა ჰიბრიდული ავტოფოკუსითა და f/2.0 დიაფრაგმით, რომელსაც 4K ვიდეოს გადაღება შეუძლია და გააჩნია კომპანიის SteadyShot ფუნქციონალურობა.

ორივე სმარტფონი Android Oreo-ზე მუშაობს, ტექნიკურ მონაცემებს კი რაც შეეხება, ორივე მუშაობს Qualcomm-ის Snapdragon 630 პროცესორზე, რაც საოცარ წინსვლას წარმოადგენს XA და XA1-ის Mediatek-ის პროცესორების ფონზე. ოპერატიული მეხსიერების მხრივ, XA2 ის 3GB-იანია, ხოლო უფროს ძმა, 4GB-იანი. შიდა მეხსიერება ორივეში 32GB-ს შეადგენს, თუმცა შესაძლებელია microSD ბარათით გაზრდაც. ორივე აღჭურვილია USB Type-C პორტებით და NFC-ით მობილური გადახდებისთვის. ბატარეა მომცრო მოდელს 3300, ხოლო უფროს მოდელს 3580 მილიამპერი მოცულობის აქვს, ორივეს აქვს Qnovo ადაპტიური დამუხტვის და სწრაფი დატენვის მხარდაჭერა Stamina რეჟიმებთან ერთად.



ფერებს რაც შეეხება, ორივე ხელმისაწვდომი იქნება შავ, ნაცრისფერ, ლურჯ და ვარდისფერ ვარიანტებში. ფასი ამ დრომდე უცნობია, თუმცა Sony-ის თქმით, ის ძალიან ძვირი არ იქნება და საშუალო კლასისთვის საკმაოდ დაბალანსებული.