Sep 6, 2017    სმარტფონები  Google, Xiaomi, Android System

Xiaomi-მ თავისი პირველი სმარტფონი წარადგინა სუფთა Android-ით - Mi A1

ჯერ კიდევ 2014 წელს, Google-მა წარადგინა Android One პროგრამა, რომელიც ისახავდა განვითარებადი ბაზრებისთვის ხარისხიანი და ამავდროულად დაბალ ბიუჯეტიანი სმარტფნების შეთავაზებას, რომელზეც Google-ის სუფთა Android-ის სისტემა იქნებოდა. Android one სერიის სმარტფონები თავდაპირველად ინდოეთისთვის იყო განკუთვნილი, თუმცა თანდათანობით ის მეტ ქვეყანაში შევიდა, როგორიცაა რუსეთი, თურქეთი და საქართველოც კი.

Android One პროგრამის წარმატების შემდეგ, Google-მა ეკოსისტემა გააფართოვა და უკვე აღნიშნული სერიის სმარტფონები არა მხოლოდ დაბალ ბიუჯეტიან სეგმენტში შეგვხვდება, არამედ უფრო მაღალშიც.

პირველი Android One სმარტფონი საშუალო სეგმენტში წარადგინა ზუსტადაც Xiaomi-მ. ეს არის მათი პირველი სმარტფონი სუფთა Android-ის სისტემაზე - Xiaomi Mi A1.

სინამდვილეში Mi A1 არის Xiaomi-ს ახლად-წარდგენილი Mi5X, რომელიც ჩვეულებრივ MIUI-ზე მუშაობს, ხოლო Mi A1 არის გადარქმეული 5X, რომელიც Google-ის სუფთა Android-ის აქტუალურ ვერსიაზე მუშაობს, კერძოდ კი 7.1.2 Nougat-ზე, 8.0 Oreo-ს განახლება მალევე მოვა, ასევე სმარტფონი ოფიციალურად მიიღებს Android P-ის მხარდაჭერას.

ტექნიკურ მონაცემებს რაც შეეხება, სმარტფონს წინა მხარეს 5.5 ინჩიანი LCD ტიპის Full HD ეკრანი აქვს განთავსებული. თითის ანაბეჭდის სენსორი უკან განთავსდა. ის მუშაობს Qualcomm-ის ყველაზე წარმატებულ საშუალო კლასის Snapdragon 625 8 ბირთვიან პროცესორზე, რომელიც განსაკუთრებით გამოირჩევა უნაკლო, ძალიან სწრაფი წარმადობით და რა საკვირველია აქამდე არსად ნახული ენერგოეფექტურობით. შიდა მეხსიერება 64GB, ხოლო ოპერატიული 4GB არის. სმარტფონს ასევე გააჩნია 3,080 მილიამპერიანი ბატარეა, სწრაფი დამუხტვის საშუალება და USB Type-C შესაერთებელი პორტი. Snapdragon 625 პროცესორმა კი ბატარეის ძალიან კარგი სიცოცხლისუნარიანობა უნდა უზრუნველყოს.

კამერებს რაც შეეხება, კომპანიამ დიდი ყურადღება მიაქცია მათ, მიუხედავად იმისა, რომ სმარტფონი საშუალო კლასს ეკუთვნის, ფასი კი ბიუჯეტური სმარტფონის აქვს.

Mi A1-ს ორმაგი OmniVision-ის კამერის სენსორი გააჩნია უკან, ისეთი, როგორიც Xiaomi-ს ფლაგმანურ Mi6-ზე გვხვდება. ორივე კამერა 12 მეგაპიქსელიანია f/2.2 დიაფრაგმით, თუმცა 1 ერთი კამერა ჩვეულებრივი, ხოლო მეორე ტელეფოტო სენსორია ოპტიკური ორმაგი ზუმით, რომელსაც iPhone 7 Plus და Galaxy Note8-ის მსგავსად შეუძლია პორტრეტული ფოტოს გადაღება, ობიექტის ფონის დაბურვით. კომპანიამ პრეზენტაციაზე კამერის დაბურვის ეფექტს დიდი ყურადღება მიაქცია და აღნიშნა, რომ ის iPhone 7 Plus-საც კი სჯობს ობიექტების გამოყოფაში ფონისგან.

ფერების მხრივ, Mi A1 ხელმისაწვდომია შავ, ოქროსფერ და ვარდისფერ ფერებში. ქვეყნებიდან, ის 37 ქვეყანაში ჩაეშვება გაყიდვაში, მათ შორის ინდოეთში, რუსეთში, უკრაინაში და ევროპის რამდენიმე ქვეყანაში. ფასი სულ რაღაც $230-ს შეადგენს, რაც ასეთი ტიპის სმარტფონისთვის ძალიან კარგი ფასია.