Jan 30, 2018    სმარტფონები, ჭკვიანი საათები  Xiaomi, smartphone, Smartwatch, Huami

Xiaomi-ს ორი ახალი Huami ქვე-ბრენდის ჭკვიანი საათი

Xiaomi ნაკლებად ცნობილი ბრენდია ჭკვიანი საათების მხრივ, თუმცა ბევრს არც კი გეცოდინებათ, რომ კომპანიას თავისი ქვე-ბრენდი აქვს - Huami, რომელიც სწორედ სატარებელი ტექნოლოგიებზე არის ორიენტირებული.

გასულ წელს, კომპანიამ თავისი პირველი Android Wear საათი, Huami Amazfit წარადგინა, რომელიც GPS-ით აღჭურვილი ყველაზე იაფი ჭკვიანი საათი იყო, კერძოდ კი სულ რაღაც $99 ღირდა ამერიკულ ეკვივალენტში. სამწუხარო ისაა, რომ აღნიშნული საათით მხოლოდ აზიის ბაზარი განებივრდა, ის არ იყო ხელმისაწვდომი ამერიკასა და ევროპაში, თუმცა სწორედ საათის მეორე თაობაში კომპანიას ამის გამოსწორება სურს. Huami ამჯერად ორი ჭკვიანი საათით დაბრუნდა - Amazfit Sports 2 და Amazfit Watch 2S.

ორი საათიდან უფრო კლასიკურად Amazfit 2S გამოიყურება, რომლის ეკრანი საფირონის შუშითაა დაფარული და ნატურალური ტყავის სამაჯური აქვს, თუმცა არ აქვს ისეთი ფუნქციები, როგორიცაა გულის ცემის სენსორი და GPS-ი.

მეორე მხრივ, Amazfit Sports 2-ს 1.34 ინჩიანი ეკრანი აქვს, რომელიც 2.5D შუშითაა შეფარული და 320 x 300-ზე რეზოლუცია აქვს. იმისათვის, რომ მისი ტარება კომფორტული იყოს სპორტით დაკავებისას, აქ რეზინის სამაჯურებია. რადგან საათი სპორტულ ადამიანზეა მორგებული, კლასიკური საათისგან განსხვავებით, აქვს ჩაშენებული GPS და გულის ცემის სენსორიც.

ის მუშაობს Qualcomm-ის საათებზე მორგებულ Snapdragon Wear 2100 პროცესორზე, რომელსაც მხარს 768MB ოპერატიული და 4GB შიდა მეხსიერება უჭერს, რათა შესაძლებელი იყოს მოწყობილობაზევე მუსიკის ჩაწერა და ტელეფონის გარეშე მოსმენა. საათს ასევე საკმაოდ მძლავრი ბატარეა აქვს, რომელიც, კომპანიის თქმით, GPS რეჟიმში 35 საათს გაძლებს ერთჯერად დამუხტვაზე. ორივე საათი ასევე გაუმჯობესებული 5ATM სერტიფიკატითაა დაცული წყლისგან და შეუძლია ცურვის ამოცნობა, ამასთან ერთად სირბილის კრუგების დათვლა, დარტყმის სტილები და ა.შ ორივე საათი ასევე აღჭურვილია კერამიკის კანტებითა და 316L უჟანგავი ფოლადის ღილაკებით.

სპორტული საათი დასაწყისისათვის 999 იუანი დაჯდება, რაც $150-ის ექვივალენტია, რაც გაცილებით უფრო მეტია, ვიდრე პირველი თაობის Amazfit საათი. მეორე მხრივ, კლასიკური მოდელი, რომელსაც არც GPS და არც გულის ცემის სენსორი აქვს, უფრო პრემიალური დამზადების გამო 1,499 იუანი დაჯდება, რაც $226-ის ექვივალენტია. Huami-ს თქმით, ორივე საათი გაიყიდება ამერიკაშიც, თუმცა მოგვიანებით.