Dec 7, 2017    სმარტფონები  Xiaomi Redmi 5

Xiaomi Redmi 5 - პირველი უჩარჩო სმარტფონი ბიუჯეტურ კლასში

Xiaomi-ს სმარტფონები და პროდუქცია ძირითადად დაბალ-ბიუჯეტიანი სეგმენტითაა ცნობილი, სადაც კომპანია მაქსიმალურად ცდილობს შესანიშნავად აწყობილი სმარტფონის დიზაინი და მისი შიგთავსი - ტექნიკური მახასიათებლები შემოგვთავაზოს საკმაოდ დაბალ ფასად. Xiaomi-ს ყველაზე წარმატებული და გაყიდვადი - Redmi სერია გახდა, რომელიც არა ფლაგმანური, არამედ საშუალო - ბიუჯეტურ კლასში გადის, თუმცა, მიუხედავად ამისა, ამ სერიის წყალობით, კერძოდ კი Redmi 4 და Redmi Note 4-ით, კომპანიამ პირველი ადგილი მოიპოვა ინდოეთში, სადაც სტატისტიკურად მათ Samsung-ის გაყიდვებსაც კი გადაუსწრეს.

Redmi 4 და Redmi Note 4 თავის კლასში და საფასო კატეგორიაში ერთ-ერთი საუკეთესო სმარტფონები იყო. შეიძლება პროგრამული უზრუნველყოფა და სმარტფონის სამომხმარებლო ინტერფეისი შორსაა Android-ის რეალურ არსთან, თუმცა ფასისა და აწყობის ხარისხის შეფარდების მიხედვით ისინი შეუდარებელია. მათ საკმაოდ ბევრი ფანი საქართველოშიც გამოუჩნდა, ამრიგად, Redmi სერიის გაგრძელება ყველასათვის სასიხარულო იქნება.

წლევანდელი წლის უდიდესი ტრენდი, მოგეხსენებათ - უჩარჩო ეკრანებია, რომლებიც 18:9 ასპექტურ ფარდობას იყენებენ გვერდითა თუ ზედა-ქვედა კანტების შესამცირებლად. რაოდენ გასაკვირიც არ უნდა იყოს, მსგავსი ეკრანის ტენდენცია საშუალო და ბიუჯეტურ კლასშიც ჩამოიწია ფლაგმანურიდან და უკვე თითქმის ყველა მწარმოებელი გვთავაზობს უჩარჩო სმრტფონს მაღალ თუ დაბალ საფასო კატეგორიაში.

Xiaomi-ს Redmi სერიის შემდეგი წარმომადგენლები Redmi 5 და 5 Plus-ია, რომლებიც მომხმარებელს დაბალ ფასში უჩარჩო ეკრანსა და შესანიშნავ დიზაინს სთავაზობს.

საწყისისთვის, აქ განთავსებულია საკმაოდ დიდი, 5.7 ინჩიანი ეკრანი, რომლის ასპექტური ფარდობა, როგორც უკვე მიხვდებოდით - 18:9 არის. რეზოლუცია ცოტა დაბალია - 720P (1440 x 720), რაც ამხელა ეკრანის ზომის გათვალისწინებით 282 პიქსელს გვაძლევს ერთ ინჩზე, თუმცა ფასიდან გამომდინარე, ამაზე არ უნდა ვიწუწუნოთ.

სმარტფონის გული ყველასთვის საყვარელი Snapdragon 625-ია, რომელიც საშუალო კლასის სმარტფონებში დიდი პოპულარობით სარგებლობს თავისი ენერგო-ეფექტურობისა და სისწრაფის შეფარდების გამო. მას მხარს რამოდენიმე კონფიგურაციის ოპერატიული და შიდა მეხსიერება უჭერს: არის მინიმალური ვერსია 2GB ოპერატიულითა და 16GB შიდა მეხსიერებით, 3/32 ან ყველაზე მაქსიმალური - 4/64GB კომბინაცია, რომელიც რასაკვირველია, ამ სამიდან ყველაზე ძვირი იქნება.

კამერა 12 მეგაპიქსელიანია F/2.0 დიაფრაგმით. რასაკვირველია აქ ვერ დავინახავთ ორმაგ კამერის სენსორს ან პორტრეტულ რეჟიმს, რადგანაც აღნიშნული ტექნოლოგია ჯერ ვერ დავიდა ბიუჯეტურ კლასზე. უკან, კამერასთან ერთად თითის აბეჭდის სენსორია განთავსებული, წინ კი 5 მეგაპიქსელიანი წინა კამერაა F/2.0 დიაფრაგმითა და 1080P ვიდეოს გადაღების შესაძლებლობით.

ბატარეა 3,300 მილიამპერს შეადგენს, რაც Snapdragon 625-თან წყვილობაში საკმაოდ კარგი შედეგი უნდა მოგვვეს. ორივე სმარტფონი მუშაობს Android 7.1.2 ვერსიაზე კომპანიის MIUI 9 ინტერფეისით და ახლო მომავალში არაა დაგეგმილი მისი განახლება Android 8.0 Oreo-ზე, თუმცა ეს გასაკვირიც არ უნდა იყოს, იქიდან გამომდინარე, რომ Xiaomi-ს სამომხმარებლო ინტერფეისი უფრო მნიშვნელოვანია, ვიდრე მწვანე რობოტი.

ორი სმარტფონიდან უფრო დიდი ზომის - Redmi 5 Plus-ია, რომელსაც 6 ინჩიანი ეკრანი აქვს. ისევე, Snapdragon 625-ზე მუშაობს, ხოლო ეკრანის გაფართოება უფრო დიდია და 1080P-ს შეადგენს. Plus ვერსიაში მხოლოდ 4/64 ვერსია იქნება ხელმიაწვდომი. კამერებს რაც შეეხება, ისინი აქ მცირე მოდელის იდენტურია.

ფასები ჯერ-ჯერობით უცნობია, რადგან კომპანიამ სმარტფონები ხუთშაბათს უნდა წარადგინოს, თუმცა ჩინეთში, მათი საბაზრო ღირებულება არ გადააჭარბებს $200-ს.